11.12.2025
Shoqata “Bashkimi” e ftuar në shënimin e Ditës Ndërkombëtare të të Drejtave të Njeriut në Oerlikon.
Shoqata Kulturore “Bashkimi” pati kënaqësinë dhe nderin të ishte e ftuar dhe prezente në aktivitetin e organizuar në Oerlikon, me rastin e shënimit të Ditës Ndërkombëtare të të Drejtave të Njeriut, nën patronazhin e Shefit të Misionit Konsullor të Republikës së Kosovës në Cyrih, z. Vigan Berisha, në bashkëpunim me Shoqatën “Parandalo”.
Ky manifestim kishte për qëllim theksimin e rëndësisë së respektimit, promovimit dhe mbrojtjes së të drejtave themelore të njeriut, si dhe fuqizimin e dialogut dhe solidaritetit brenda komunitetit tonë në mërgatë.
Për Shoqatën “Bashkimi” ishte një kënaqësi e veçantë të ishte pjesë e një aktiviteti me kaq rëndësi shoqërore dhe njerëzore. Ne mbështesim dhe vlerësojmë lart iniciativa të tilla, të cilat kontribuojnë në ndërtimin e një shoqërie më të drejtë, më të barabartë dhe gjithëpërfshirëse.
Shoqata “Bashkimi” shpreh respekt të veçantë për punën e palodhur dhe të vazhdueshme që Shoqata “Parandalo” bën në shërbim të kauzave sociale dhe njerëzore. Një mirënjohje e veçantë shkon për drejtuesit dhe aktivistët e kësaj shoqate, të cilët me përkushtim japin kontribut të çmuar në komunitet.
Gjithashtu, falënderojmë Shefin e Misionit Konsullor të Republikës së Kosovës në Cyrih, z. Vigan Berisha, i cili së bashku me ekipin e tij është gjithmonë aktiv dhe i pranishëm në mbështetje të aktiviteteve që promovojnë vlera universale, bashkëpunim dhe mirëqenie për mërgatën shqiptare.
Shoqata “Bashkimi” do të vazhdojë të mbështesë dhe të jetë pjesë e aktiviteteve që promovojnë dinjitetin njerëzor, të drejtat e njeriut dhe bashkëpunimin ndërmjet institucioneve dhe shoqatave shqiptare në Zvicër.
No comment