Uster, 17.01.2026
Në ambientet e Shoqatës “Bashkimi” patëm nderin të mirëpresim Kryetarin e Horës së Arbëreshëve nga Sicilia (Piana degli Albanesi), zotin Rosario Peta, i cili ishte i shoqëruar nga bashkëshortja dhe vajza e tij.Zoti Peta ndodhej në Zvicër me ftesë të organizatorëve të aktivitetit “Gjenocidi në Kosovë”, i cili u mbajt më 18 janar 2026 në Zürich.Kryetari Rosario Peta u shoqërua në lokalin e Shoqatës sonë nga përfaqësues të Shoqatës “Hora e Skënderbeut”, me të cilën kemi bashkëpunuar në iniciativën për vendosjen e Shtatores së Gjergj Kastriotit, Skënderbeut në Horën e Arbëreshëve në Sicili. Në këtë takim morën pjesë edhe disa shoqata dhe miq që kishin qenë të pranishëm në inaugurimin e kësaj shtatoreje në Piana degli Albanesi. Në këtë mbrëmje të veçantë morën pjesë Ansambli Vatra, Ansambli Arbëresha, Ansambli Shqiponja, Studio Aktrimi, Qendra “Gjenocidi në Kosovë”, si dhe pianistja Fationa Matraku nga Parisi.
Pas fjalës hyrëse të Dan Morinës, Kryetari i Shoqatës “Bashkimi”, Guximtar Alushi, përshëndeti të pranishmit dhe falënderoi në veçanti zotin Rosario Peta për vizitën dhe për lidhjen e fortë që bashkon shqiptarët kudo që jetojnë.
Mbrëmja u hap artistikisht nga Yllka Zuzaku me këngën “Gjergj Kastrioti”, duke krijuar një atmosferë të veçantë mes miqve dhe bashkëpunëtorëve.
Programi artistik vazhdoi me interpretimet muzikore të Altin Asllanit, i cili me kitarën e tij solli disa këngë të dashura për publikun. Mbrëmjen e pasuruan gjithashtu me performancat e tyre Bexhet Sallahi, si dhe Afërdita dhe Kujtim Krasniqi, duke e bërë këtë takim edhe më të ngrohtë dhe të paharrueshëm.
Takimi përfundoi në një atmosferë miqësore dhe vëllazërore, duke forcuar edhe më tej lidhjet mes komunitetit shqiptar në Zvicër dhe arbëreshëve në Itali.
No comment